靈魂藍圖解碼 - 人類圖基本概念

歡迎收聽 STARSEED 遊學團！我係 Felicia，將會係呢個啟發性嘅旅程中陪你探索人類圖嘅世界。經過短暫休息，我好興奮可以再次深入探討點樣解碼你獨特嘅靈魂藍圖，即係你嘅人類圖。

自從三月以來，我哋已經錄製咗26集，今次我嘅拍檔 Minutes 會休息一陣。喺接下來嘅系列中，我會帶領你了解人類圖——無論你係新人，定係想更加深入了解。

人類圖系統結合咗西洋占星、易經、卡巴拉、脈輪系統同量子物理學。每集節目旨在幫助你了解自己嘅能量動態，改善人際關係，並更真實地導航自己嘅人生使命。

今集我哋會簡單介紹人類圖，討論佢點樣成為我哋生活嘅藍圖。學習點樣搵到你嘅圖表，以及佢反映你獨特優勢同潛力。

讓我哋一齊展開呢段變革嘅旅程，擺脫社會嘅制約，擁抱自我獨特性。記得訂閱，獲取可以引領你過上更自覺、更充實生活嘅見解！如果你有問題，隨時DM我 Instagram @felicia_global。

下集見！

Transcript

Hello, 大家好！我係 Felicia，歡迎收聽 STARSEED 遊學團！已經有幾個月冇 upload 新嘅 podcast 了，多謝大家繼續支持我。Starseed 遊學團不知不覺都已經由年三月開始到而家，我哋已經錄製咗26集，一路呢都同我嘅拍檔 Minutes 一齊錄製，而嚟緊呢幾個月會有啲唔同，我嘅拍檔 Minutes 會休息一陣。就係呢會由我主持。在這個系列中，我會分享點樣自己拆解你嘅人類圖，亦即你嘅靈魂藍圖。希望透過呢個 podcast，可以幫助大家踏上一個更加自覺、更加自主嘅人生，用咗踏實嘅腳步去行靈性嘅生活。

無論你係已經聽過人類圖，但未有詳細研究，定係你曾經接觸過但唔知點解讀，抑或你已經認識自己嘅人類圖，想更深入了解人類圖如何反映你自己同身邊嘅人際關係，記得要訂閱呢個 Channel！因為接下來，我會幫助大家更好地認識你嘅靈魂藍圖，教你點樣由淺入深，正確理解自己嘅人類圖，仲會解釋一些常見嘅誤解。

今集呢我哋會簡單介紹吓，其實人類圖係咩呢？人類圖點樣喺我哋嘅生活裏面提供一個好好嘅藍圖呢？亦都可以點樣搵到自己嘅人類圖呢？

我哋出世嗰一刻，恆星流動嘅中微子為我哋留下一個印記，呢個印記完全反映喺我哋嘅人類圖中。人類圖決定咗我哋嘅獨特設計，幫助我哋了解本質，同埋顯示潛力和互動模式。

簡單來講，人類圖結合咗西洋占星、易經、卡巴拉、脈輪系統同量子物理學，係一個人類自我探索嘅系統。每個人嘅人類圖都獨一無二，佢展示我哋嘅能量如何運作，以及與世界互動。

人類圖唔係宗教或占卜工具，同任何信仰無關。了解你嘅人類圖可以幫你用最簡單、最開心嘅方式，活出屬於自己嘅豐盛人生，幫助你去發現自己嘅人生使命、了解自己、改善你嘅人際關係、搵到一個合適你嘅工作事業，甚至令你變得更加健康。

喺過去呢10年從事瑜伽 & 身心靈健康嘅工作，我亦都見證好多人的身體狀況。好多時我哋嘅健康來源，除咗係來自我哋嘅日常生活飲食習慣，亦都好視乎我哋嘅內在機制，例如我哋自己嘅受外界嘅制約、信念系統、思考模式、情緒管理等等。

係人類圖嘅引導下，你會學識點樣正確衡量自己嘅能力，為自己建立適合嘅規範，避免陷入能量超支嘅狀態。慢慢會學識點樣尊重同表達你自己嘅感受同意願，由受害者轉化成為生命嘅創造者。

人類圖係一套博大精深嘅系統，學習可能要花幾年時間。人類圖創辦人 Ra Uru Hu 講過，一個人需要大約七年去經歷去除外在制約嘅過程，重新建立你嘅內在權威，成為最開心、最自在嘅自己。

乜嘢係制約（Conditioning）呢？例如社會有一套標準來量度成功、開心，大人會用上一代，或傳統一刀切嘅模式去定義一個小朋友係乖、懶惰、愚蠢等等。從細細個開始，我哋往往會被社會或家庭嘅傳統觀念定義自己。如果用一樣嘅模式去定義自己，而呢個定義剝削咗我哋嘅本質，久而久之，我哋會感到挫敗、痛苦、疲倦。

地球嘅意識不斷躍進，我哋要知道每個人都獨特，對快樂和成功嘅定義都唔一樣。所以，最重要嘅係搵返自己獨特嘅能量藍圖，成功經營自己嘅人生。

當我哋認識自己嘅能量藍圖，慢慢去除外在嘅制約，就會找到內在權威，重新定義和創造自己嘅實相。我哋亦會學識尊重他人嘅能量藍圖，欣賞每一個人嘅獨特性，理解社會嘅多元化。

要知道自己嘅人類圖，需要你嘅出世年月日和時辰。為咗更準確，有時仲需要知道出世嘅分鐘。不過，大部分情況下，你嘅出世年月日同時辰已經提供咗好多資訊。

你可以上 Google 搜尋「Jovian Archive」，輸入你嘅出世資料，準確地選擇你嘅地區，就可以得到你嘅人類圖。至於我自己做 reading 時，鍾意用 Neutrino Platform 嘅訂閱版本，因為可以查看四個箭嘴變量、Transit Chart 同合併圖。但基本上，只需要用 Jovian Archive 就可以得到你嘅人類圖。

差唔多啦！下一集我會解釋一個人類圖嘅基本架構。如果有時間，可以上網下載你嘅人類圖，咁你就可以一邊聽一邊參考自己嘅人類圖啦。臨走之前，希望大家可以訂閱我哋嘅 Channel！如果有問題，記得 DM 我 Instagram @Felicia_global。我哋下集再見！